بات بات

يناير 30, 2010 أضف تعليقا

من يموت الكصب تصعد روحة ناي
ومن يموت الغيم تنزل روحة ماي

واليعيش بلا لسان دموعة صوت…
وصرخة الظالم سكوت
فطر حايطنه حياة
والقصر تابوت موت….
وحشة الدربونه عيد
والشمس مشرقهه ايدي… رغم عشت بلايه ايد….

بيد بيد….
بيد بينه شما تريد
على اعنادك نبقه واحد ويد بيد
واحنه مثل هلال خايب
شما يموته الشهر يطلع من جديد….
وليش ليش….؟؟
ما نسالك ليش ليش
من شفت بارض الوطن صاحو مزاد..
ترددت بس كلمة وحده ……………بيش بيش
ليش بيش؟
وليش جتفت الضمير؟!
…..يا ضمير؟!
قاطك مخطط اهانه
الذله لو الهه وزارة ؟
بكل جدارة انته الوزير…….

روح روح…
مانكلك روح روح
صنم انته بلايه روح…
واحنه واحدنه اذا تصعدله روح
يصير دنيا لوحده بعالم الروح…
وانته ضل شما صعدت انته قزم…
شما تمد ايدك علينه ماتلوح…

ومال مال….
الكرسي حدرك يا غشيم
بسرعة مال….!!
شكد خطيه….
مال عمرك كله مال…!
ولو يميل المال يوكع لا محال….

ودار دار….
والله جذابه القراءة بيوم كالت
دار دار
صاحب القاط اقتبس هاي العبارة
وحطهه دلاعة بشعارة
(لكل مواطن دار دار)….
لهسه نتهجة الحروف وماكو دار
فقط بس واحد فقط نعتبره دار
الزمن من دار …دار

ودور دور….
الحوسم اجم شبر بارضه ضل يدور…
نريد دور
نريد دور
كافي ملينه على الهامش ندور….
وكافي لحم جتافنه يشبع القصور….

وكافي كافي
اعله الرصيف نشوف حافي
الشوارع بالوطن صارت منافي….

وصاد صاد….
بصدر عاري اجم سهم مسموم صاد…
وكالو اصبر…
دورت بس (بر) لكيت..!!
وتهت بالبر وانتهيت
ثاري حتى من الصبر بكو الصاد

وبات بات….
جم يتيم بصدره عبره
اعله الرصيف بجوعه بات…!؟
محيبس ومليون عظمة
وطن مو محبس بديكم

يا شريف يصيح بات…..؟؟؟

التصنيفات:عباس العلاق

يلعايش بصوتي

يناير 30, 2010 أضف تعليقا

يلعايش بصوتي جروح..
تشهگ
بيه عبره
شما اسولف بيك
لاخر ليل …
وتردني الدموع شراع…..

ياوجه الگمر طوّلت مالك صوت؟؟
وانت الچنت تكبر من تطيح بگاع…

ماطابت
لهسّه جروحك تغني
وبعدهه جروح……

گتلك بعد وكتك
مو وكتهه تروح!!

عصرة موت بيه
أشتهت صوتك ناي……
يعزفلي
واموت بواهسك بهداي…
شحچيلك بعد خاطر تموت وياي!!!.

وتلم واهسك
والعشگ
وآخر كاس..
تضحك من صدگ
وتضحّك المذبوح…
انه گطرة نده
وصبحك يطشني جروح…..
أعيش بواهس عيونك
يلفني الليل….
وانتانيك أنه وكل ورد الولايه
وأتاني بشفتك أحجايه….

وأظل گطرة نده بصبحك
يجيني ويه الشمس جرحك
يرد الروح…..
وماتلگاني …واتلگاك…..
تايه والجروح جروح….

المّلك واهسي
ودموعي
والصفنات…..
أغنيلك (غريبه الروح)…
لاتضحك…..

ردت بس أفهم عيونك
وأسولفلك عليه شصار……
من خليتني بيّن الدمع والنار

گلت لخاطرك أرسم الدمعه شموع…..
واضحكلك صدگ من خاطري المکسور
أصيرلّك خلگ تمثال
اغنيلك(عدد مالامت العذال)

أصير بّاب جرحك ناي………..

انه عطشان
وأنت الليل
حته الليل يشرب گمر وجهك ماي…….

بيه عتاب
مدري دموع!!!
ماگتلك بحالي شصار….
من شفت عله چفك أثر دم شموع….

ومن طاحت بشفتك چلمة الله وياك….
چن طاح عله راسي الليل……

لاتهتم
الك فدوه ضحكتي
وخاطري المكسور
وظنوني….

ولاتهتم
ولاريدك تهم بيه….
ولاريدك تعيش لخاطر عيوني….

أنه بروحي خريطة حزن ماتنطب
أنه بروحي عطش دنيه
وصحاري سنين……
يبست وشبقه من أغصانهه أتحطب…

ولاتهتم بحالي شصار….
أنت بروحك أسرار الشمس والماي
وآنه بلا ضوه ظليت…….

ظل مرتاح
لاتسأل بعد عالروح….
أنه بلاروح……
بس شوف القصيده شكثر بيهه جروح
بس
شوف
القصيده
شكثر
بيهه

التصنيفات:ميثاق الهلالي

ما كسر عينك جرح

يناير 30, 2010 أضف تعليقا


شيوگف بعينك بعد!!!
لاضحكه لاصوره ألي
ولاكسر عينك جرح؟؟!!!
تذكر شگد فرفحت من ودعتني ورحت؟؟
والليل سيّر علّي…..

شتسوي راجع بعد وتگلي عندك شمس
عصفورحبك سكت
وي هبة العاصفه
وماظل طعم للصبح….

شوف آنه بيه شكثر لوعه وحزن وعتاب
بياحال أنه وتشتكي من جرحك الچذاب….
لاتشتكي من الجرح…
ماثق بعد بالحچي
تقنعني عندك جرح؟؟!!

ومابيه أردّن بعد
لاتعتب عله الگلب
شتريد تعتب بعد خليت بيهه ملح!!….

أنت الكتلت الشعر
وأنت الذبحت الحرف….
سيّر عليك النده من ودعتني ورحت
وجروحي بغيبتك سيّر عليهه النزف…..

وأنت الگطعت الورد مامات من وحّدّه
لاتنكرالمسأله
شتريد اوضح بعد
عاين بچفك عدل وتشوف دم ونده……

وشتسوي راجع بعد ليلي بكبر صفنتي
ومايستحي من الشمع…….
لاتبچي يمي چذب طاح عله خدك ضِحِك
مامقتنع بيه دمع…..

وماصدّگ بكل بشر ….وماحسبه صاحب صدگ
من ينجرح صاحبّه
ويعتب عله السچّين…….

ومامقتنع بالجرح من ينزف شمانزف
بس گلي عندك جرح ينزف بقايا سنين!!؟؟

وانه انزف بلاگلب …….
وأضحكلك بلاگلب….
مافكرت باليجي ولاحسبتلّه حساب……..
خلصت عمري ركض
جيت أركض بلاگلب كلساع توگع سنه
وسديت بابك علّي
وبجرحي خضّر باب….

موهيچ گالوا ولك..
تواسيني المن بعد من ذبل عمري وخلص!!
لسنين فدوه ألك ……

وخلصت وربك لطف بيه ونسيت الجرح…..
وطاح عله جرحي النده وربك گضاهه وجزت
ماريد جيتك علّي كونك تمرني ملح…..

ولتصدّگ ارجع بعد وبدربك ولاأمر…
الحمد لله گضت بس كلفتني عمر

التصنيفات:ميثاق الهلالي

جام الشرف

يناير 30, 2010 أضف تعليقا

طفله عدهه وفارشه الليل الطويل
أعله الرصيف تبات مامرهه الترف

تنام من تغفه السكارى بتالي ليل
ومن صباح الله يگّعدهه الشرف

صاحبة حرفة- ألا هل من شريف-
يسد نزاع الجوع يصحاب الحرف

وفوگ منهه قصور تضحك عالفقير
بكثر ماشافت برد بيهن غرف..

ومن تفك الشُرف نسوان القصور
تلالي دمعتهه أعله وجنات الشُرف

ومدت الچف وأنكسر جام الحياء
ومسحت الدمعه ولحم خدهه أنجرف..

وساوموهه.الشرف صاحت. بتّ أبوي-
ورفت الشيله وعلم عالجبهه رف

وتذبل بگد ماعليهه يعاينون
وتستحي بگد ماوجه چفهه انعرف..

وتبچي. تكسر خاطره ويبچي الرصيف
وفوگ صدره توازت وياهه السرف..

وخيط صارت والمرض سچينه حاد
وطرف كضه الموت والعفه بطرف…

وأنحنت سنبله وحل وكت الحصاد
والمناجل من بِعد توميلهه…..

توادعت وي بتهه يم باب الرصيف
ووصته.. لو نامت يلوليلهه…

ووصت الطفله الشرف بالچ يطيح
أنطتهه شيلتهه وسترهه وحيلهه…

طفله وإحتارت تودع أمهه بيش
تبوس أديهه! تلم دمع! تبچيلهه!

ساعه تبچي.. وساعه تضحك عالدموع
وساعه تحچي ..وساعه يوگف ميلهه..

من تشوف اطفال.. توگف عالجروح
ومن تحس بالجوع تلكد خيلهه..

وكبرت الطفله وزغر بيت الرصيف
أحلامهه أتحدى السمه تكفيلهه…

ومالگت فارس يضمهه أبين أديه
ومن تصيح جروحهه يغنيلهه..

گامت منّ أتنام تكفر بالحياة
ومن تشوف اثنين تلعن جيلهه..

وذبلت شفاف الترافه من الصياح
وذبل بيهه الصبح وانهد ليلهه…

چفهه يرجف من تلامسهه الچفوف
ويشتعل غيره ويرد يشكيلهه…

وتستحي تمد أيدهه گامت تخاف
وخلت چفوف الدمع تحچيلهه…

شوف هاي شلون غيرتهه عله ذيچ
وشوف ذيچ شلون عصرت ليلهه…

ذابله ومادنگت راس امهه يوم
اطيح شيلتهه وشرفهه يشيلهه..

عين خلت للدمع وبصفهه عين
أعله العبايه الماتدنس ذيلهه…

كوخ مالازم قصر يهل القصور
ومن براميل النفط نبنيلهه….

هاي لازم موعلى هام الرؤوس

فوگ دستورالعراق نشيلهه

فوگ دستورالعراق نشيلهه

التصنيفات:ميثاق الهلالي

اشتهيتك

يناير 30, 2010 أضف تعليقا

ناي بليله تنزف نغمة وداع
أشتهيتك وانچفت حفنة سوالف

صبح ضحكاتك وليل الدمع ذاك
وحياة عيونك وموت الشفايف

أنه بطور الخريف وغيبتك ريح
بغصن ذبلان شتسوي العواصف؟!!

وعمر تانيت طيفك ياخذالعين
وردت صوتك يمر..ومرني خايف

فرق مابين صوتك واليكرهوك
فرق السجن وگلوب المضايف..

بعدني أذكر ضحكتك وأذبل فراگ
ولهسه بّاب صوتك عقلي واگف.

عود الناس مثلك تهمس وياي
أخلافك كلهن اسمعهن قذايف!

بطرگ ساتر غيابك مابقه سلاح
الحچي ينزل رصاص وآنه اشاگف=

بديه وينتهي دور البطولات
وتخطف ذكرياتك والسوالف…

وأحن لكلشي بيك وكلهن ثگال
صوتك عينك أسمك والشفايف….

لطفولتنه لدمعنه لكلشي حنيت
لبساطتنه لذهب ليل الصرايف…

لحچايات أهلنه لبيض الگلوب
لسياسة مستحه تحل المواقف

الچانوا عنك يگلولي أنساه
وأگلهم مايخالف حته أخالف…

أنسه شلون وانت بجرحي مرسوم!
شما يبچي الجرح تنزل عواطف…

شگد جروح تنزف بيه وتموت
بس جرحك كتلني وبعده نازف …

وگبلك شايف وعايف عصافير
بس من شفتك ولاچني شايف..

چنت چم مره تخطف خطفة الريل
وين الله وتظل هالمره واگف…

خلافك تايه مسافر بالوجوه
شكثر صاحوا وراي ومااوالف..

وشگد حاولوا بس مادرت بال
شلون ألتذ بغيرك وانه حالف!!

ألك ضميت كلشي شفافي والناي
خاطر من تجي توّن الصرايف..

ولو شمسك طفت بس راح أتانيك
وأضم دفتر جروحك والمصاحف

وعله أطراف المدينه أزرعلك عيون
وتجي وتشوفهه تبچّي المشارف

وّلو لمن تجي حاسبلك تروح
وأموت بروحتك بس راح أجازف …

ياهو الگالك خلصت سلامات!
وياهو الگالك صارت سوالف!!

من شوغة حزن لحچاية وداع
(وصرتلك سالفه بحلگ الطوايف)

وصرت لوحة جرح من خنجرك ذاك
وّلاغربه اشترتني ولامعارف

صرت لوحة جرح بالنزف ماطار
و مثل طرّك بگلبي السيف ماطار
أنكسر جنحي بعد لتخاف ماطار
بقفص.. بره القفص.. نفس القضيه

التصنيفات:ميثاق الهلالي

اني لو اكدر انسه

يناير 29, 2010 أضف تعليقا

اني لو اكدر انسه
جان من الاول انساك
ما اذل روحي هاي الذله
اتوسل حتى ابقى وياك


من جنت تكلي ابعد لحظه
ازعل وي روحي وماارضه
ايدك ببدي واني اتوسل
لا تبعد اترجاك


راجع هسه تكلي انساني
مو كتلك ماكدر اني
عايش على حبك تدريني
ومااكدر اعيش بلياك


اني ضحيت بعمري
احلى سنين واغلى ايام
حتى تظل يمي وما ترحل
وعيونك بعيوني تنام
ما همني العمر الضحيته
ولا همني الدمع البجيته
اكثر من هذا اضحيلك
بس لا تجرحني بفركاك

التصنيفات:ضياء الميالي

انا اتذكرك

يناير 29, 2010 أضف تعليقا

انا اتذكرك بالنوم
واحسك غافي باحضاني
واخاف بنومك انت تشوف
غيري واني تنساني
احسك بالكلب دكات
وبالدم حبك الك ماشي
واذا فكرت انام الكاك
متمدد على فراشي
اعوفك عالمخده تنام
واحط راسي على الكاشي
وعالكاشي وافكر بيك
واحجي بذكرك الكاني

التصنيفات:ضياء الميالي
Follow

Get every new post delivered to your Inbox.