واليعيش بلا لسان دموعة صوت…
وصرخة الظالم سكوت
فطر حايطنه حياة
والقصر تابوت موت….
وحشة الدربونه عيد
والشمس مشرقهه ايدي… رغم عشت بلايه ايد….

بيد بيد….
بيد بينه شما تريد
على اعنادك نبقه واحد ويد بيد
واحنه مثل هلال خايب
شما يموته الشهر يطلع من جديد….
وليش ليش….؟؟
ما نسالك ليش ليش
من شفت بارض الوطن صاحو مزاد..
ترددت بس كلمة وحده ……………بيش بيش
ليش بيش؟
وليش جتفت الضمير؟!
…..يا ضمير؟!
قاطك مخطط اهانه
الذله لو الهه وزارة ؟
بكل جدارة انته الوزير…….

روح روح…
مانكلك روح روح
صنم انته بلايه روح…
واحنه واحدنه اذا تصعدله روح
يصير دنيا لوحده بعالم الروح…
وانته ضل شما صعدت انته قزم…
شما تمد ايدك علينه ماتلوح…

ومال مال….
الكرسي حدرك يا غشيم
بسرعة مال….!!
شكد خطيه….
مال عمرك كله مال…!
ولو يميل المال يوكع لا محال….

ودار دار….
والله جذابه القراءة بيوم كالت
دار دار
صاحب القاط اقتبس هاي العبارة
وحطهه دلاعة بشعارة
(لكل مواطن دار دار)….
لهسه نتهجة الحروف وماكو دار
فقط بس واحد فقط نعتبره دار
الزمن من دار …دار

ودور دور….
الحوسم اجم شبر بارضه ضل يدور…
نريد دور
نريد دور
كافي ملينه على الهامش ندور….
وكافي لحم جتافنه يشبع القصور….

وكافي كافي
اعله الرصيف نشوف حافي
الشوارع بالوطن صارت منافي….

وصاد صاد….
بصدر عاري اجم سهم مسموم صاد…
وكالو اصبر…
دورت بس (بر) لكيت..!!
وتهت بالبر وانتهيت
ثاري حتى من الصبر بكو الصاد

وبات بات….
جم يتيم بصدره عبره
اعله الرصيف بجوعه بات…!؟
محيبس ومليون عظمة
وطن مو محبس بديكم

ياوجه الگمر طوّلت مالك صوت؟؟
وانت الچنت تكبر من تطيح بگاع…

ماطابت
لهسّه جروحك تغني
وبعدهه جروح……

گتلك بعد وكتك
مو وكتهه تروح!!

عصرة موت بيه
أشتهت صوتك ناي……
يعزفلي
واموت بواهسك بهداي…
شحچيلك بعد خاطر تموت وياي!!!.

وتلم واهسك
والعشگ
وآخر كاس..
تضحك من صدگ
وتضحّك المذبوح…
انه گطرة نده
وصبحك يطشني جروح…..
أعيش بواهس عيونك
يلفني الليل….
وانتانيك أنه وكل ورد الولايه
وأتاني بشفتك أحجايه….

وأظل گطرة نده بصبحك
يجيني ويه الشمس جرحك
يرد الروح…..
وماتلگاني …واتلگاك…..
تايه والجروح جروح….

المّلك واهسي
ودموعي
والصفنات…..
أغنيلك (غريبه الروح)…
لاتضحك…..

ردت بس أفهم عيونك
وأسولفلك عليه شصار……
من خليتني بيّن الدمع والنار

گلت لخاطرك أرسم الدمعه شموع…..
واضحكلك صدگ من خاطري المکسور
أصيرلّك خلگ تمثال
اغنيلك(عدد مالامت العذال)

أصير بّاب جرحك ناي………..

انه عطشان
وأنت الليل
حته الليل يشرب گمر وجهك ماي…….

بيه عتاب
مدري دموع!!!
ماگتلك بحالي شصار….
من شفت عله چفك أثر دم شموع….

ومن طاحت بشفتك چلمة الله وياك….
چن طاح عله راسي الليل……

لاتهتم
الك فدوه ضحكتي
وخاطري المكسور
وظنوني….

ولاتهتم
ولاريدك تهم بيه….
ولاريدك تعيش لخاطر عيوني….

أنه بروحي خريطة حزن ماتنطب
أنه بروحي عطش دنيه
وصحاري سنين……
يبست وشبقه من أغصانهه أتحطب…

ولاتهتم بحالي شصار….
أنت بروحك أسرار الشمس والماي
وآنه بلا ضوه ظليت…….

شتسوي راجع بعد وتگلي عندك شمس
عصفورحبك سكت
وي هبة العاصفه
وماظل طعم للصبح….

شوف آنه بيه شكثر لوعه وحزن وعتاب
بياحال أنه وتشتكي من جرحك الچذاب….
لاتشتكي من الجرح…
ماثق بعد بالحچي
تقنعني عندك جرح؟؟!!

ومابيه أردّن بعد
لاتعتب عله الگلب
شتريد تعتب بعد خليت بيهه ملح!!….

أنت الكتلت الشعر
وأنت الذبحت الحرف….
سيّر عليك النده من ودعتني ورحت
وجروحي بغيبتك سيّر عليهه النزف…..

وأنت الگطعت الورد مامات من وحّدّه
لاتنكرالمسأله
شتريد اوضح بعد
عاين بچفك عدل وتشوف دم ونده……

وشتسوي راجع بعد ليلي بكبر صفنتي
ومايستحي من الشمع…….
لاتبچي يمي چذب طاح عله خدك ضِحِك
مامقتنع بيه دمع…..

وماصدّگ بكل بشر ….وماحسبه صاحب صدگ
من ينجرح صاحبّه
ويعتب عله السچّين…….

ومامقتنع بالجرح من ينزف شمانزف
بس گلي عندك جرح ينزف بقايا سنين!!؟؟

وانه انزف بلاگلب …….
وأضحكلك بلاگلب….
مافكرت باليجي ولاحسبتلّه حساب……..
خلصت عمري ركض
جيت أركض بلاگلب كلساع توگع سنه
وسديت بابك علّي
وبجرحي خضّر باب….

موهيچ گالوا ولك..
تواسيني المن بعد من ذبل عمري وخلص!!
لسنين فدوه ألك ……

وخلصت وربك لطف بيه ونسيت الجرح…..
وطاح عله جرحي النده وربك گضاهه وجزت
ماريد جيتك علّي كونك تمرني ملح…..

تنام من تغفه السكارى بتالي ليل
ومن صباح الله يگّعدهه الشرف

صاحبة حرفة- ألا هل من شريف-
يسد نزاع الجوع يصحاب الحرف

وفوگ منهه قصور تضحك عالفقير
بكثر ماشافت برد بيهن غرف..

ومن تفك الشُرف نسوان القصور
تلالي دمعتهه أعله وجنات الشُرف

ومدت الچف وأنكسر جام الحياء
ومسحت الدمعه ولحم خدهه أنجرف..

وساوموهه.الشرف صاحت. بتّ أبوي-
ورفت الشيله وعلم عالجبهه رف

وتذبل بگد ماعليهه يعاينون
وتستحي بگد ماوجه چفهه انعرف..

وتبچي. تكسر خاطره ويبچي الرصيف
وفوگ صدره توازت وياهه السرف..

وخيط صارت والمرض سچينه حاد
وطرف كضه الموت والعفه بطرف…

وأنحنت سنبله وحل وكت الحصاد
والمناجل من بِعد توميلهه…..

توادعت وي بتهه يم باب الرصيف
ووصته.. لو نامت يلوليلهه…

ووصت الطفله الشرف بالچ يطيح
أنطتهه شيلتهه وسترهه وحيلهه…

طفله وإحتارت تودع أمهه بيش
تبوس أديهه! تلم دمع! تبچيلهه!

ساعه تبچي.. وساعه تضحك عالدموع
وساعه تحچي ..وساعه يوگف ميلهه..

من تشوف اطفال.. توگف عالجروح
ومن تحس بالجوع تلكد خيلهه..

وكبرت الطفله وزغر بيت الرصيف
أحلامهه أتحدى السمه تكفيلهه…

ومالگت فارس يضمهه أبين أديه
ومن تصيح جروحهه يغنيلهه..

گامت منّ أتنام تكفر بالحياة
ومن تشوف اثنين تلعن جيلهه..

وذبلت شفاف الترافه من الصياح
وذبل بيهه الصبح وانهد ليلهه…

چفهه يرجف من تلامسهه الچفوف
ويشتعل غيره ويرد يشكيلهه…

وتستحي تمد أيدهه گامت تخاف
وخلت چفوف الدمع تحچيلهه…

شوف هاي شلون غيرتهه عله ذيچ
وشوف ذيچ شلون عصرت ليلهه…

ذابله ومادنگت راس امهه يوم
اطيح شيلتهه وشرفهه يشيلهه..

عين خلت للدمع وبصفهه عين
أعله العبايه الماتدنس ذيلهه…

كوخ مالازم قصر يهل القصور
ومن براميل النفط نبنيلهه….

هاي لازم موعلى هام الرؤوس

فوگ دستورالعراق نشيلهه

الدنيه ليل وبعده بردان الجرح

…

انت بجروحك شمس من قدرة الله

شيگدر عليهه الملح

..

ياحسين الليل اكل وجه الصبح

…

ومطرت سهام الخيانه

وخضّر بصدرك رمح

….

والدنيه ذبلت

كلهه ذبلت

حته مهر الگاع يبست غيرته

وذب اللجام

…

وعفيه صدرك هاكثر بيه مستحه

يشيل السهام

….

وعفيه خلگك خلگ غيمه

لوحدّك بالطف بقيت وتمطر جروحك زلم

….

وسافرت گوه القوافل

….

ووحشه صار الطف عليك

….

ورجفت شفاف الحلم

وانت وحدك والتراب وليله ظلمه

وعطش ذبّل ماتبقى من الورود

….

وعزفت الريح أعله اوتار الجرح

لحن الخلود

…….

الليل والنجمه وتراتيل الگمر

….

والصبح والشمس

والدم والمطر

……

كلهه غنت للحرب من زفتّك

وكلهه ذبلت لمن ذبلت شفتّك

….

وسيرّت أمك عله الطف الكئيب

دمعه أجتّك بايت الليل بضلعهه

…

ويم عرس جرحك دمع خضّر شمعهه

….

وضحكت جروحك بوجه الزهره نور

….

وّگفت الگاع شيقنعهه وتدور

!!

وجابت العبّاس يمك

گامت تلولي عليكم

/

أسم الله يبعد أمكم يغالين

أسم الله يبو فاضل يالحسين

….

وباست العبّاس بعيونه وبچت

…

وطاحت الدمعه محنّه عله الجرح

..

وشمتك شمه عله صدرك

لمن طاح الليل بفراش الصبح

….

وسولفلهه الطف عليكم

من وگع عباس من وگفن خواته

….

وسولفلهه العطش عنكم

لحد مايبست لهاته

…

ويالسان اليگدر يوصل معاناة الحرم

ويحچی عن مأساة زينب

كلهه سكته

الليل والشط والحمام

كلهه سكته..الدنيه خوف

وسولف الدخان بوجوه الخيام

….

وكتب ذكرى أعله الافق

ذكرى عاشوراء في يوم أنتصار

الدم على بحر السيوف

…

المصادف يوم ملحمة الچفوف

الموافق جيش (إسلامي) عبر حد الحلم

…

المصادف بت علي داست على رگاب الزلم

….

الموافق رادوايخضّر يزيد من الجرح

المصادف خضّر العبّاس گوه عله الملح

المصادف بقت جثه بلايه راس

الموافق ثبتت للدين أساس

الموافق جربه كاتلهه العطش

المصادف خضرّوا منهه أثنعش

في شهر اسمه محرم مو محرم بيه قتال

لا محرم عالعطاشه تضوگ گطره من الفرات

..

في نهر عطشان غيره وشرب من رگبة طفل

…

في سنه واجب نسميهه العطش

ذكرى نار وموت وعيون وملح

وذكرى وردة طفل طاحت بأول صيار الصبح

…

وذبلت الورده ندى بچف الحسين

وذبلت شفافه قصيده

ونزلت دموعه عله ايده

وسگه الورده وخضّر العباس بچفوف الحسين

وذكرى ملحمة الأخوّه ..القارعه ..النصر المبين

وذكرى كل ورده التطگ تطلع حسين

وتذبل ويتبدّه عبّاس وجربته

..

ومن جديد تخضر الورده حسين